Mikrodalğalı soba seçimi zamanı hansı faktorlara diqqət yetirməliyik?

13.09.2014

Dövrümüzün  inkişaf etməsi və əksər insanların sürətli həyat tərzi sürməsi, yemək bişirilməsinə ayrılan vaxtın azalmasına gətirib çıxaran amillərdən biridir. Buna görə də, indiki zamanda mikrodalğalı sobalar hər bir evin, müəssisənin əvəzolunmaz məişət texnikasından biridir. Əgər öncədən mikrodalğalı sobalar yalnız  hazır yeməklərin qızdırılması üçün nəzərdə tutulurdusa, indiki gününmüzdə müasir mikrodalğalı sobalar bir çox funksiya ilə istifadəçilərə xidmət göstərir. Digər tərəfdən mikrodalğalı sobalar yemək bişirilməsinə sərf edilən vaxtın azaldılması ilə yanaşı, elektrik sərfiyyatına da  qənaət edir. Mikrodalğalı sobanın qeyd olunan xidmətlərindən faydalanmaq üçün isə ilk öncə onu düzgün seçmək lazımdır. Mikrodalğalı sobanın seçim zamanı ilk olaraq aşağıdakı məqamlara diqqət yetirmək lazımdır:

  • mikrodalğalı sobanın funksiyaları
  • mikrodalğalı sobanın  həcmi
  • mikrodalğalı sobanın işləmə gücü
  • mikrodalğalı sobanın iç örtüyü və dizaynı.
Mikrodalğalı sobaların funksiyaları onun növündən aslıdır. Məsələn, sadə mikrodalğalı soba əldə etməklə siz yalnız isitmə, buzaçma kimi funksiyalardan yararlana bilərsinizsə, çoxfunksiyalı mikrodalğalı soba əldə etməklə siz qril, qizartma, un məmulatları bişirə, balıq qizartma və s. kimi funksiyalardan da yararlana bilərsiniz.
Mikrodalğalı sobalar həcmə görə adətən 18 lt-dən başlayır, 40 lt və üzəri istehsal edilir. Əgər ailəniz 2 nəfərdən ibarətdirsə sizə 18 lt mikrodalğalı soba kifayət edəcək. Daha artıq sayda  ailə üzvləriniz varsa bu zaman siz 25 lt və daha artıq həcmə malik modellər seçməlisiniz.
Mikrodalğalı sobanın işləmə gücü onun gördüyü işdən aslıdır. Məsələn  ərzağın buzunu açmaq üçün mikrodalğalı soba 300-500 Vt istifadə edir, yemək bişirmək üçün 700 Vt və daha çox, qril bişirmə zamanı isə bu göstərici 800-1500 Vt arası dəyişir. Ortalama isə mikrodalğalı soba 700 -1800 Vt güc göstəricisi ilə işləyir.
Mikrodalğalı sobalar iç örtük materialına görə isə  mikrodalğalı sobalar aşağıdaki növlərə ayrılır:
  • emal örtüklü 
  • keramik örtüklü
  • biokeramik örtüklü
  • paslanmaz polad örtüklü.
Bunların arasında ən keyfiyyətlisi biokeramik örtüklü iç kameraya sahib  mikrodalğalı sobalardır. Belə ki, biokeramikadan hazırlanmış  səth çox asan təmizlənir, ərzağın qoxusunu özundə saxlamır, düz və parlaq olur.
Mikrodalğalı sobalardan istifadə edərkən qizdırılan ərzağın hansı qabda olması da vacib məqamlardan biridir. Mikrodalğalı sobada qizdırılma zamanı farfor, fayans, plastmass kimi qablardan istifadə etmək olar.Əgər qabın üzərində hər hansı bir metal işləmə varsa bu qablardan istifadə etmək olmaz, çünki bu halda kamerada qığılcım yarana bilər və bu da qısa qapanma  kimi hallara gətirib çıxara bilər.

Şərhlər

Şərh yoxdur

Şərh yazın
captcha
Müqayisə et (0)